«Atalanta» bosh murabbiyi Raffaele Palladino Italiya A Seriyasining 33-turida «Roma» bilan qayd etilgan durangdan so‘ng, jamoasi bor e’tiborini mamlakat Kubogidagi ishtirokiga qaratishi kerakligini ma’lum qildi. «Roma» bilan uchrashuv 1:1 hisobida yakunlandi.

Palladino o‘z jamoasini maqtadi va har ikkala raqibda ham g‘alaba uchun imkoniyatlar bo‘lganini tan oldi.

«Endi Italiya Kubogi yarim finali — ehtimol, hozirgi vaqtda mavsumimizning eng muhim o‘yini bo‘ladi. Biz finalga chiqishni juda ham xohlaymiz», — deya mutaxassisning so‘zlarini Sky Sport keltirmoqda.

Italiya Kubogi yarim finalida «Atalanta» 22 aprel kuni o‘z maydonida Rimning «Lasio» klubini qabul qiladi. Bir kun avval esa boshqa bir to‘qnashuvda Milanning «Inter» jamoasi o‘z uyida «Komo» bilan kuch sinashadi.