«Аталанта» бош мураббийи Раффаэле Палладино Италия А Сериясининг 33-турида «Рома» билан қайд этилган дурангдан сўнг, жамоаси бор эътиборини мамлакат Кубогидаги иштирокига қаратиши кераклигини маълум қилди. «Рома» билан учрашув 1:1 ҳисобида якунланди.
Палладино ўз жамоасини мақтади ва ҳар иккала рақибда ҳам ғалаба учун имкониятлар бўлганини тан олди.
«Энди Италия Кубоги ярим финали — эҳтимол, ҳозирги вақтда мавсумимизнинг энг муҳим ўйини бўлади. Биз финалга чиқишни жуда ҳам хоҳлаймиз», — дея мутахассиснинг сўзларини Sky Sport келтирмоқда.
Италия Кубоги ярим финалида «Аталанта» 22 апрель куни ўз майдонида Римнинг «Лацио» клубини қабул қилади. Бир кун аввал эса бошқа бир тўқнашувда Миланнинг «Интер» жамоаси ўз уйида «Комо» билан куч синашади.
