Xokkey bo‘yicha O‘zbekiston milliy terma jamoasi Jahon chempionati uchinchi divizionining “A” guruhiga yo‘l oldi. O‘zbekiston uchinchi divizionning "B" guruhi doirasidagi hal qiluvchi beshinchi bahsda mezbon – Gonkong jamoasini 9:4 hisobida mag‘lub etdi. Bu haqda O‘zbekiston xokkey federasiyasi matbuot xizmati xabar berdi.

Normunds Seeys boshqaruvidagi O‘zbekiston terma jamoasi guruhdagi barcha o‘yinlarda g‘alaba qozonib, birinchi o‘rinni egalladi va bu natija evaziga “A” guruhiga yo‘llanmani qo‘lga kiritdi. Eslatib o‘tamiz, o‘tgan yilning aprel oyida jamoa Yerevanda to‘rtinchi divizion g‘olibi bo‘lgan edi. O‘zbekiston Xalqaro xokkey federasiyasiga (IIHF) 2019 yilda qabul qilingan.

“A” guruhi uchun kurash yo‘lida O‘zbekiston terma jamoasi quyidagi raqiblaridan ustun keldi:

Mo‘g‘uliston (26:1)
Filippin (28:3)
KXDR (20:3)
Lyuksemburg (14:0)
Gongkong (9:4)

Lyuksemburg ustidan qozonilgan g‘alaba o‘zbekistonlik xokkeychilarga ushbu divizionning "B" guruhida gol urish bo‘yicha yangi rekord o‘rnatish imkonini berdi. Avvalgi rekord Qirg‘iz Respublikasiga tegishli edi (2023 yilda 76 ta gol). Turnir yakunlariga ko‘ra, O‘zbekiston hisobida jami 97 ta shayba mavjud.

Vadim Kravchenko musobaqaning eng yaxshi xokkeychisi deb topildi. O‘zbekiston terma jamoasining asosi Toshkentning “Humo” va “Binokor” jamoalari hisoblanadi.

2027 yilda O‘zbekiston terma jamoasi uchinchi divizionning “A” guruhida Tayvan, Meksika, Bosniya va Gersegovina, JAR hamda Tailand jamoalari bilan kuch sinashadi. “A” guruhida so‘nggi o‘rinni egallagan Turkmaniston terma jamoasi esa 2027 yilda o‘z yurishini "B" guruhida davom ettiradi.