Tajribali markaziy hujumchi Robert Levandovski kelasi mavsumda ham Kataloniyaning «Barselona» klubida qolishi mumkin. Bu haqda Mundo Deportivo nashri xabar bermoqda.

Manba bergan ma’lumotlarga ko‘ra, 37 yoshli hujumchining manfaatlarini himoya qiluvchi futbol agenti Pini Zaxavi «ko‘k-anorranglilar» bilan o‘z mijozining kelajagini muhokama qiladi. Levandovskining «Barselona» bilan amaldagi mehnat shartnomasi joriy mavsum yakunida nihoyasiga yetadi.

Kataloniya grandi yulduzli to‘purarga yangi bir yillik shartnoma taklif qilishga tayyor. Robertning o‘zi ham bir qator Yevropa klublari tomonidan qiziqishlar bo‘layotganiga qaramay, «Barselona»da qolishga qarshi emas. Ispaniya chempionatining joriy mavsumida Levandovski 25 ta o‘yin o‘tkazib, 12 ta gol urdi va bitta golli uzatmani amalga oshirdi.