«Manchester Siti» o‘zaro bahsda «Arsenal» ustidan g‘alaba qozonib (2:1), turnir jadvalida «kanonirlar»ga yaqinlashib oldi. «Shaharliklar» Rayan Sherki va Erling Xolandning 16 hamda 65-daqiqalardagi aniq zarbalari evaziga zafar quchishdi. Mehmonlar tarkibida 18-daqiqada Kay Xavers gol urishga muvaffaq bo‘ldi.
«O‘yindan so‘ng yigitlarga shunday dedim: "Bu damdan zavqlaning, lekin diqqatni yo‘qotmang, chunki oldimizda hamma narsani hal qiladigan yana uch-to‘rt hafta bor“», — dedi «Siti» bosh murabbiyi Xosep Gvardiola matbuot anjumanida.
Londonliklar bilan ochkolar o‘rtasidagi farq uchtagacha qisqardi, shu bilan birga Manchester grandi zahirasida bitta o‘yin bor. Agar «Siti» chorshanba kuni safarda «Byornli»ni mag‘lub etsa, ochkolar bo‘yicha «Arsenal»ga yetib oladi.
