Myunxenning «Bavariya» klubi o‘z maydonida «Shtutgart» ustidan qozonilgan g‘alabadan (4:2) so‘ng muddatidan oldin Germaniya Bundesligasi chempioniga aylandi. Jamoa bosh murabbiyi Vensan Kompani ushbu muvaffaqiyat haqida o‘z fikrlarini bildirib o‘tdi.
«Ajoyib hissiyotlar. Men uchun qo‘lga kiritilgan har bir sovrin xuddi birinchisidek qadrli. Bunday lahzalarni alohida qadrlash kerak. Bu muvaffaqiyat ortida nafaqat joriy mavsumdagi mashg‘ulotlar, balki uzoq davom etgan mehnat yotibdi. Mavsum hali yakunlangani yo‘q, biz boshqa sovrinlar uchun ham da’vogarlik qilmoqdamiz. Chempionlar ligasida bizni jiddiy sinov — "PSJ"ga qarshi yarim final bahsi kutmoqda. Ammo ungacha Kubok doirasida "Bayer"ga qarshi o‘ynashimiz kerak», — deya mutaxassisning so‘zlarini keltirmoqda DAZN.
«Bavariya» 79 ochko jamg‘ardi va Germaniya chempionatida raqobatchilari uchun yetib bo‘lmas darajaga ko‘tarildi.
