Fransiya chempionatining (Liga 1) 30-turi doirasida kechgan «PSJ» va «Lion» jamoalari o‘rtasidagi uchrashuvdan (1:2) so‘ng parijliklar bosh murabbiyi Luis Enrike o‘z fikrlari bilan o‘rtoqlashdi.

Mazkur bahsda «PSJ» vakillari faol harakat qilganiga qaramay, yakunda imkoniyatni boy berishdi. Murabbiy uchrashuv davomida jamoada ko‘plab vaziyatlar bo‘lganini ta’kidlab o‘tdi:

— Biz o‘yinni nazorat qilish va xavfli vaziyatlar yaratishga intildik. Biroq raqib o‘ziga berilgan dastlabki ikki imkoniyatni golga aylantirishga muvaffaq bo‘ldi. Bahs qiyin kechishini oldindan bilar edik. Uchrashuv davomida 23 marotaba zarba yo‘lladik, hatto penaltidan foydalana olmagan vaziyatlarimiz ham bo‘ldi. O‘yin yo‘nalishini o‘zgartirishga urinsak-da, buning iloji bo‘lmadi, — dedi L. Enrike.

Shuningdek, mutaxassis raqib jamoaning harakatlariga to‘xtalib, oldinda turgan vazifalar haqida gapirdi:

— «Lion» jamoasi ajoyib o‘yin namoyish etdi. Biz bu natijani qabul qilib, navbatdagi muhim bahslarga tayyorgarlik ko‘rishimiz lozim. Hozirda tig‘iz taqvim asosida har uch kunda maydonga tushmoqdamiz. Barcha musobaqalarda g‘oliblik uchun kurash olib borayotganimiz sababli ko‘plab futbolchilarga o‘yin amaliyoti berishga majburmiz, — deya qo‘shimcha qildi murabbiy.