Italiyaning “Verona” klubi hujumchisi Gift Orban A Seriyaning 33-turidan o‘rin olgan “Milan”ga qarshi o‘yindan (0:1) so‘ng muxlis bilan mushtlashib ketdi. Bu haqda Corriere Dello Sport nashri xabar berdi.

Nashr ma’lumotlariga ko‘ra, Orban muxlis bilan suratga tushish uchun mashinasini to‘xtatishdan bosh tortgan, shundan so‘ng muxlis futbolchining avtomobiliga zarba bergan. Nigeriyalik forvard mashinadan tushib, u bilan janjallashgan. Mushtlashuv mehmonxona xodimining aralashuvi bilan to‘xtatilgan va u Orbanni yana mashinaga qaytishga majbur qilgan.

Ma’lumot uchun, nigeriyalik hujumchi joriy mavsum Italiya A Seriyasi doirasida 29 ta uchrashuvda maydonga tushib, 7 ta gol va 3 ta golli uzatmaga mualliflik qilgan. Shuningdek, Orban bitta uchrashuvda qizil kartochka olib, maydonni tark etgan. Transfermarkt portali uning bozor qiymatini 10 million yevroga baholamoqda.

Ayni damda “Verona” Italiya chempionati turnir jadvalida 33 ta o‘yindan so‘ng 18 ochko jamg‘argan holda 19-o‘rinni egallab turibdi.