Италиянинг “Верона” клуби ҳужумчиси Гифт Орбан А Сериянинг 33-туридан ўрин олган “Милан”га қарши ўйиндан (0:1) сўнг мухлис билан муштлашиб кетди. Бу ҳақда Cорриэре Делло Спорт нашри хабар берди.

Нашр маълумотларига кўра, Орбан мухлис билан суратга тушиш учун машинасини тўхтатишдан бош тортган, шундан сўнг мухлис футболчининг автомобилига зарба берган. Нигериялик форвард машинадан тушиб, у билан жанжаллашган. Муштлашув меҳмонхона ходимининг аралашуви билан тўхтатилган ва у Орбанни яна машинага қайтишга мажбур қилган.

Маълумот учун, нигериялик ҳужумчи жорий мавсум Италия А Серияси доирасида 29 та учрашувда майдонга тушиб, 7 та гол ва 3 та голли узатмага муаллифлик қилган. Шунингдек, Орбан битта учрашувда қизил карточка олиб, майдонни тарк этган. Transfermarkt портали унинг бозор қийматини 10 миллион еврога баҳоламоқда.

Айни дамда “Верона” Италия чемпионати турнир жадвалида 33 та ўйиндан сўнг 18 очко жамғарган ҳолда 19-ўринни эгаллаб турибди.