Londonning «Tottenxem» klubi himoyachi va jamoa sardori Kristian Romeroni yozgi transfer oynasida sotishga tayyor. Cadena 3 nashrining xabariga ko‘ra, klub futbolchi uchun ikki xil narx belgilagan.

Agar argentinalik himoyachiga Angliyadan tashqaridagi klublardan taklif tushsa, «shporlar» taxminan 43,7 mln yevro talab qilishadi. Biroq APLning boshqa bir jamoasi Romeroni sotib olmoqchi bo‘lsa, transfer qiymati 61 mln yevrogacha ko‘tarilishi mumkin. Qayd etilishicha, ushbu narxlar jamoaning mavsum yakunida APLda qolish-qolmasligiga bog‘liq emas.

Ma’lumot uchun, 27 yoshli Romero joriy mavsumda barcha turnirlarda 32 ta o‘yinda maydonga tushib, himoyachi bo‘lishiga qaramay, 6 ta gol va 4 ta golli uzatmaga mualliflik qildi. Uning londonliklar bilan amaldagi shartnomasi 2029 yilning yozigacha mo‘ljallangan.