«Manchester Siti» ustozi Xosep Gvardiola «Bavariya» bosh murabbiyi Vensan Kompanining Myunxendagi faoliyati haqida o‘z fikrlarini bildirib o‘tdi.

«Shaharliklar»ning sobiq himoyachisi myunxenliklarni ketma-ket ikkinchi bor Bundesliga chempionligi sari boshlab keldi. E’tiborlisi, joriy mavsumda jamoa Germaniya oliy divizionida gol urish bo‘yicha mutlaq rekordni yangiladi.

«Vinni va «Bavariya»ni tabriklayman. Ular yuqori saviyadagi — ko‘plab gollar va xavfli vaziyatlarga boy bo‘lgan zavqli futbol namoyish etishmoqda. Butun klubni ushbu muvaffaqiyat bilan qutlayman. Oldinda ularni Chempionlar ligasi yarim finali kutmoqda va men, albatta, ularga omad tilayman», — deya Gvardiolaning so‘zlarini keltirmoqda Bayern & Germany.

Eslatib o‘tamiz, ispaniyalik mutaxassisning o‘zi ham 2013-2016 yillar davomida «Bavariya»ni boshqargan edi. Vensan Kompani qo‘l ostidagi myunxenliklar esa joriy mavsumda ichki birinchilikda tengsiz ekanliklarini muddatidan oldin isbotlab qo‘yishdi.