«Манчестер Сити» устози Хосеп Гвардиола «Бавария» бош мураббийи Венсан Компанининг Мюнхендаги фаолияти ҳақида ўз фикрларини билдириб ўтди.
«Шаҳарликлар»нинг собиқ ҳимоячиси мюнхенликларни кетма-кет иккинчи бор Бундеслига чемпионлиги сари бошлаб келди. Эътиборлиси, жорий мавсумда жамоа Германия олий дивизионида гол уриш бўйича мутлақ рекордни янгилади.
«Винни ва «Бавария»ни табриклайман. Улар юқори савиядаги — кўплаб голлар ва хавфли вазиятларга бой бўлган завқли футбол намойиш этишмоқда. Бутун клубни ушбу муваффақият билан қутлайман. Олдинда уларни Чемпионлар лигаси ярим финали кутмоқда ва мен, албатта, уларга омад тилайман», — дея Гвардиоланинг сўзларини келтирмоқда Bayern & Germany.
Эслатиб ўтамиз, испаниялик мутахассиснинг ўзи ҳам 2013-2016 йиллар давомида «Бавария»ни бошқарган эди. Венсан Компани қўл остидаги мюнхенликлар эса жорий мавсумда ички биринчиликда тенгсиз эканликларини муддатидан олдин исботлаб қўйишди.
