«Chelsi» himoyachisi Trevo Chaloba Premyer-liga doirasida «Brayton»dan qabul qilib olingan qaqshatqich mag‘lubiyat (0:3) sabablari haqida to‘xtaldi.

Avvalroq «ko‘klar» ustozi Liam Rosenyor futbolchilarning o‘yinga yetarlicha kirishmaganidan shikoyat qilgan edi. Biroq Chalobaning fikricha, muammo ishtiyoqda emas.

«Gap intilishda emas — yigitlar maydonda borlarini berishdi. Kiyinish xonasida hammaning qanchalik charchagani ko‘rinib turardi. Biz yugurdik, bor kuchimiz bilan harakat qildik, ammo bugun raqib bizni shunchaki mag‘lub etdi», — deya ingliz futbolchisining so‘zlarini keltirmoqda taniqli insayder Fabrisio Romano.

Ma’lumot uchun, ushbu mag‘lubiyat «Chelsi» uchun chempionatdagi ketma-ket beshinchisi bo‘ldi. E’tiborlisi, londonliklar mazkur beshta o‘yinning birortasida raqib darvozasini ishg‘ol eta olishmadi. Jarima maydonchasidagi samaradorlik va natijalarning pastligi jamoaning inqirozda ekanidan dalolat bermoqda.