«Челси» ҳимоячиси Трево Чалоба Премьер-лига доирасида «Брайтон»дан қабул қилиб олинган қақшатқич мағлубият (0:3) сабаблари ҳақида тўхталди.

Аввалроқ «кўклар» устози Лиам Росеньор футболчиларнинг ўйинга етарлича киришмаганидан шикоят қилган эди. Бироқ Чалобанинг фикрича, муаммо иштиёқда эмас.

«Гап интилишда эмас — йигитлар майдонда борларини беришди. Кийиниш хонасида ҳамманинг қанчалик чарчагани кўриниб турарди. Биз югурдик, бор кучимиз билан ҳаракат қилдик, аммо бугун рақиб бизни шунчаки мағлуб этди», — дея инглиз футболчисининг сўзларини келтирмоқда таниқли инсайдер Фабрицио Романо.

Маълумот учун, ушбу мағлубият «Челси» учун чемпионатдаги кетма-кет бешинчиси бўлди. Эътиборлиси, лондонликлар мазкур бешта ўйиннинг бирортасида рақиб дарвозасини ишғол эта олишмади. Жарима майдончасидаги самарадорлик ва натижаларнинг пастлиги жамоанинг инқирозда эканидан далолат бермоқда.