Xorvatiyalik futbolchi Petar Suchich «Inter»ning «Komo»ga qarshi kechgan dramalarga boy bahsida milanliklarga g‘alaba keltirgan gol muallifiga aylandi. Ushbu muvaffaqiyat «neradzurrilar»ni Italiya Kubogi finaliga olib chiqdi.
O‘yindan so‘ng g‘alaba to‘pini kiritgan futbolchi o‘z taassurotlari bilan o‘rtoqlashdi.
«Bunday vaziyatda hisobda ortda borayotib, o‘yinni o‘zgartirish oson emas. Biroq biz o‘zimizga xos bo‘lgan mentalitet tufayli buni yana bir bor uddaladik. Kuchli jamoani mag‘lub etdik va endi finalda o‘ynaymiz», — deya Suchichning so‘zlarini keltirmoqda fcinter1908.it.
Eslatib o‘tamiz, «Inter» o‘z tarixida to‘qqiz bor Italiya Kubogida zafar quchgan. Jamoa oxirgi marta ushbu sovrinni 2023 yilda qo‘lga kiritgan edi.
