Хорватиялик футболчи Петар Сучич «Интер»нинг «Комо»га қарши кечган драмаларга бой баҳсида миланликларга ғалаба келтирган гол муаллифига айланди. Ушбу муваффақият «нерадзуррилар»ни Италия Кубоги финалига олиб чиқди.
Ўйиндан сўнг ғалаба тўпини киритган футболчи ўз таассуротлари билан ўртоқлашди.
«Бундай вазиятда ҳисобда ортда бораётиб, ўйинни ўзгартириш осон эмас. Бироқ биз ўзимизга хос бўлган менталитет туфайли буни яна бир бор уддаладик. Кучли жамоани мағлуб этдик ва энди финалда ўйнаймиз», — дея Сучичнинг сўзларини келтирмоқда fcinter1908.it.
Эслатиб ўтамиз, «Интер» ўз тарихида тўққиз бор Италия Кубогида зафар қучган. Жамоа охирги марта ушбу совринни 2023 йилда қўлга киритган эди.
