«Barselona» bosh murabbiyi Xans-Diter Flik yozgi transfer oynasi vaqtida tarkibni kuchaytirish ehtimoli haqida o‘z fikrlari bilan o‘rtoqlashdi. Bu haqda taniqli insayder Fabrisio Romano xabar bermoqda.
Germaniyalik mutaxassisning ta’kidlashicha, klub ayni damda sport direktori Deku bilan birgalikda ishlamoqda va har bir qadamni sinchkovlik bilan hisoblab chiqmoqda.
«Transfer bozorida to‘g‘ri qarorlar qabul qilishimiz shart, hozirda Deku bilan shu yo‘nalishda ishlayapmiz. Biz ahmoqona xatolarga yo‘l qo‘ymasligimiz kerak. Jamoamiz yosh va yaxshi shakllangan tuzilmaga ega», — deya Flikning so‘zlaridan iqtibos keltiradi manba.
Ma’lumot uchun, «Barselona» ayni paytda Ispaniya La Ligasi turnir jadvalida yakkapeshqadamlik qilmoqda. Kataloniyaliklar 31 ta uchrashuvda 79 ochko jamg‘arishga muvaffaq bo‘lishgan. E’tiborli jihati, «ko‘k-anorranglilar» eng yaqin ta’qibchisi — Madridning «Real» klubidan 6 ochko oldinda bormoqda va ularda bitta zaxira o‘yini ham mavjud.
