«Барселона» бош мураббийи Ханс-Дитер Флик ёзги трансфер ойнаси вақтида таркибни кучайтириш эҳтимоли ҳақида ўз фикрлари билан ўртоқлашди. Бу ҳақда таниқли инсайдер Фабрицио Романо хабар бермоқда.
Германиялик мутахассиснинг таъкидлашича, клуб айни дамда спорт директори Деку билан биргаликда ишламоқда ва ҳар бир қадамни синчковлик билан ҳисоблаб чиқмоқда.
«Трансфер бозорида тўғри қарорлар қабул қилишимиз шарт, ҳозирда Деку билан шу йўналишда ишлаяпмиз. Биз аҳмоқона хатоларга йўл қўймаслигимиз керак. Жамоамиз ёш ва яхши шаклланган тузилмага эга», — дея Фликнинг сўзларидан иқтибос келтиради манба.
Маълумот учун, «Барселона» айни пайтда Испания Ла Лигаси турнир жадвалида яккапешқадамлик қилмоқда. Каталонияликлар 31 та учрашувда 79 очко жамғаришга муваффақ бўлишган. Эътиборли жиҳати, «кўк-анорранглилар» энг яқин таъқибчиси — Мадриднинг «Реал» клубидан 6 очко олдинда бормоқда ва уларда битта захира ўйини ҳам мавжуд.
