Londonning «Chelsi» klubi bosh murabbiyi Liam Rosenyor jamoadagi mavjud holat haqida o‘z fikrlarini bildirdi. Angliya Premyer-ligasining 34-turida poytaxt klubi «Brayton»dan 0:3 hisobida yirik mag‘lubiyatga uchragan edi.

Taniqli insayder Fabrisio Romanoning xabar berishicha, murabbiy futbolchilar bilan munosabatlari yaxshi ekani, biroq ichki muhitda boshqa muammolar borligini qayd etgan.

«Men o‘zim va futbolchilar o‘rtasida uzilish borligini his qilmayapman. Ammo jamoada ruhiyat va ishonch yetishmayapti», — dedi Rosenyor.

Ayni paytda «Chelsi» APL turnir jadvalida 48 ochko bilan 7-o‘rinni egallab turibdi. Mag‘lubiyat londonliklarning yevrokuboklar uchun kurashini qiyinlashtirib yubordi.

Ma’lumot uchun, navbatdagi turda Rosenyor shogirdlari o‘z maydonida «Nottingem Forest»ni qabul qiladi. Uchrashuv 4 may kuni Toshkent vaqti bilan soat 19:00 da boshlanishi rejalashtirilgan.