Лондоннинг «Челси» клуби бош мураббийи Лиам Росеньор жамоадаги мавжуд ҳолат ҳақида ўз фикрларини билдирди. Англия Премьер-лигасининг 34-турида пойтахт клуби «Брайтон»дан 0:3 ҳисобида йирик мағлубиятга учраган эди.

Таниқли инсайдер Фабрицио Романонинг хабар беришича, мураббий футболчилар билан муносабатлари яхши экани, бироқ ички муҳитда бошқа муаммолар борлигини қайд этган.

«Мен ўзим ва футболчилар ўртасида узилиш борлигини ҳис қилмаяпман. Аммо жамоада руҳият ва ишонч етишмаяпти», — деди Росеньор.

Айни пайтда «Челси» АПЛ турнир жадвалида 48 очко билан 7-ўринни эгаллаб турибди. Мағлубият лондонликларнинг еврокубоклар учун курашини қийинлаштириб юборди.

Маълумот учун, навбатдаги турда Росеньор шогирдлари ўз майдонида «Ноттингем Форест»ни қабул қилади. Учрашув 4 май куни Тошкент вақти билан соат 19:00 да бошланиши режалаштирилган.