Londonning «Tottenxem» klubi joriy mavsum yakunida Chempionshipga tushib ketadigan bo‘lsa, o‘z yetakchilarini jamoada saqlab qololmasligi mumkin. Jamoani tark etishga asosiy nomzodlardan biri sifatida markaziy himoyachi Mikki van de Ven ko‘rilmoqda.

MatchDay Central nashrining xabar berishicha, niderlandiyalik futbolchining vakillari bilan allaqachon «Chelsi» jamoasi aloqaga chiqqan. Tomonlar yozgi transfer oynasida amalga oshirilishi mumkin bo‘lgan o‘tish masalasini muhokama qilishgan.

Transfermarkt portali 25 yoshli himoyachining bozor qiymatini 65 million yevroga baholamoqda. Shuningdek, futbolchiga Ispaniya grandlari — «Barselona» va «Real Madrid» tomonidan ham qiziqishlar borligi aytilmoqda.

Ma’lumot uchun, Roberto de Dzerbi qo‘l ostidagi «Tottenxem» ayni damda APL turnir jadvalida 18-o‘rinni egallab turibdi. Chempionat yakuniga qadar jamoaning oldida bor-yo‘g‘i beshta uchrashuv qolgan. Agar vaziyat ijobiy tomonga o‘zgarmasa, «shporlar» yuqori divizion bilan xayrlashishiga to‘g‘ri keladi.