Лондоннинг «Тоттенхэм» клуби жорий мавсум якунида Чемпионшипга тушиб кетадиган бўлса, ўз етакчиларини жамоада сақлаб қололмаслиги мумкин. Жамоани тарк этишга асосий номзодлардан бири сифатида марказий ҳимоячи Микки ван де Вен кўрилмоқда.

MatchDay Central нашрининг хабар беришича, нидерландиялик футболчининг вакиллари билан аллақачон «Челси» жамоаси алоқага чиққан. Томонлар ёзги трансфер ойнасида амалга оширилиши мумкин бўлган ўтиш масаласини муҳокама қилишган.

Transfermarkt портали 25 ёшли ҳимоячининг бозор қийматини 65 миллион еврога баҳоламоқда. Шунингдек, футболчига Испания грандлари — «Барселона» ва «Реал Мадрид» томонидан ҳам қизиқишлар борлиги айтилмоқда.

Маълумот учун, Роберто де Дзерби қўл остидаги «Тоттенхэм» айни дамда АПЛ турнир жадвалида 18-ўринни эгаллаб турибди. Чемпионат якунига қадар жамоанинг олдида бор-йўғи бешта учрашув қолган. Агар вазият ижобий томонга ўзгармаса, «шпорлар» юқори дивизион билан хайрлашишига тўғри келади.