Madridning «Real» klubi himoyachisi Daniel Karvaxal va jamoa bosh murabbiyi Alvaro Arbeloa o‘rtasidagi munosabatlar sovuqlashgan. Bu haqda jurnalist Jorj Pikon xabar bermoqda.

Manbaga ko‘ra, «qaymoqranglilar» sardori murabbiyni o‘ziga nisbatan adolatsizlik qilayotganlikda ayblamoqda. Karvaxal asosiy tarkibdagi o‘rnini yo‘qotgani sababli, o‘zining JCH-2026 musobaqasiga borish imkoniyatlari keskin kamayib ketayotganidan xavotirda. Ma’lum bo‘lishicha, Arbeloa ayni damda o‘ng qanot himoyasida asosiy urg‘uni Trent Aleksander-Arnoldga qaratmoqda.

O‘z navbatida, Alvaro Arbeloa ham tajribali himoyachining zaxirada qolayotganiga nisbatan ko‘rsatayotgan reaksiyasidan norozi. Shu bilan birga, mutaxassis yaqin orada Trentni asosiy tarkibdan tushirib qoldirish niyatida emas.

Ma’lumot uchun, Dani Karvaxal joriy mavsumda barcha musobaqalar doirasida 20 ta uchrashuvda maydonga tushdi, biroq samarali harakatlarni amalga oshira olmadi.