Myunxenning «Bavariya» klubi sobiq himoyachisi Dante yana sobiq jamoasiga qaytmoqda. Biroq bu safar braziliyalik futbolchi murabbiylik rolida faoliyat yuritadi.

Taniqli insayder Florian Plettenbergning xabar berishicha, ayni damda Fransiyaning «Nissa» klubi sharafini himoya qilayotgan 42 yoshli futbolchi va «Bavariya» o‘rtasida shartnoma imzolanib bo‘lgan. Kelishuvga ko‘ra, Dante yozda futbolchilik faoliyatini yakunlaydi va Myunxen klubining U23 (o‘rinbosarlar) jamoasi bosh murabbiyi lavozimida Xolger Zaytsning o‘rnini egallaydi. Shuningdek, u klubning o‘smirlar jamoasi bilan ham ishlaydi.

Ma’lumot uchun, Dante 2012–2015 yillar davomida «Bavariya» safida to‘p surib, ko‘plab sovrinlarni qo‘lga kiritgan. Faoliyati davomida u «Juventude», «Lill», «Sharlerua», «Standard», «Borussiya M» va «Volfsburg» kabi klublarda o‘ynagan. 2016 yildan buyon esa «Nissa» himoya chizig‘ining asosiy figurasi bo‘lib kelayotgan edi.