«Chelsi» vingeri Estevao Angliya Premyer-ligasining 32-turi doirasida «Manchester Yunayted»ga qarshi o‘yinda jarohat oldi.
The Athletic nashrining xabariga ko‘ra, ushbu jarohatdan so‘ng futbolchining Jahon chempionatidagi ishtiroki katta so‘roq ostida qolmoqda. Braziliyalik iqtidorga to‘rtinchi darajali tizza osti paylari jarohati tashxisi qo‘yilgan. Bunday turdagi shikastlanishdan tiklanish uchun odatda uch oydan olti oygacha vaqt talab etiladi, bu esa uning 11 iyunda boshlanadigan mundialgacha safga qaytishini deyarli imkonsiz qilib qo‘yadi.
Braziliya terma jamoasi JCH-2026dagi ilk o‘yinini 13 iyun kuni Marokashga qarshi o‘tkazadi.
Joriy mavsumda Estevao «Chelsi» uchun barcha turnirlarda 36 ta o‘yin o‘tkazib, 8 ta gol urdi va 4 ta golli uzatmani amalga oshirdi. Braziliya terma jamoasida esa 11 ta o‘yinda maydonga tushib, 5 ta gol urishga ulgurgan edi.
