«Barselona» yarim himoyachisi Frenki de Yong klub tarixida eng ko‘p o‘yin o‘tkazgan niderlandiyalik futbolchiga aylanib, yangi rekord o‘rnatdi.

«Ko‘k-anorranglilar» safida ko‘plab buyuk niderlandiyalik yulduzlar to‘p surgan bo‘lsa-da, endilikda mutlaq rekord de Yongga tegishli. La Liga doirasidagi «Selta»ga qarshi bahs xavbek uchun kataloniyaliklar libosidagi barcha musobaqalardagi 293-o‘yin bo‘ldi. Shu tariqa, u avvalgi rekordchi Filipp Kokuni ortda qoldirdi.

E’tiborlisi, Kokuning o‘zi ushbu uchrashuvga tashrif buyurdi va Frenkini shaxsan tabriklab, unga 293 raqami tushirilgan maxsus futbolkani sovg‘a qildi. Frenki de Yong 2019 yilning o‘rtalarida Amsterdamning «Ayaks» klubidan «Barselona»ga ko‘chib o‘tgan edi. Shu yilning may oyida futbolchi 29 yoshini qarshi oladi.