«Барселона» ярим ҳимоячиси Френки де Йонг клуб тарихида энг кўп ўйин ўтказган нидерландиялик футболчига айланиб, янги рекорд ўрнатди.
«Кўк-анорранглилар» сафида кўплаб буюк нидерландиялик юлдузлар тўп сурган бўлса-да, эндиликда мутлақ рекорд де Йонгга тегишли. Ла Лига доирасидаги «Сельта»га қарши баҳс хавбек учун каталонияликлар либосидаги барча мусобақалардаги 293-ўйин бўлди. Шу тариқа, у аввалги рекордчи Филипп Кокуни ортда қолдирди.
Эътиборлиси, Кокунинг ўзи ушбу учрашувга ташриф буюрди ва Френкини шахсан табриклаб, унга 293 рақами туширилган махсус футболкани совға қилди. Френки де Йонг 2019 йилнинг ўрталарида Амстердамнинг «Аякс» клубидан «Барселона»га кўчиб ўтган эди. Шу йилнинг май ойида футболчи 29 ёшини қарши олади.
