«Manchester Siti» markaziy himoyachisi Jon Stouns joriy mavsum yakunlangach, katta ehtimol bilan jamoani tark etadi. Angliyalik futbolchining amaldagi shartnomasi iyun oyi oxirida o‘z nihoyasiga yetadi va «shaharliklar» rahbariyati hamkorlikni uzaytirishni rejalashtirmayapti.

Insayder Fabrisio Romanoning ma’lumotlariga ko‘ra, Stounsning xizmatlari «Yuventus» va Italiyaning boshqa grand klublariga taklif qilingan. «Keksa sinyora» vakillari futbolchining mahoratini yuqori baholashsa-da, uning tez-tez jarohat olishi nomzod borasida ikkilanish paydo qilmoqda. Shuningdek, Stouns uchun yana bir variant sifatida «Milan» klubi tilga olinmoqda.

May oyida Jon Stouns 32 yoshni qarshi oladi. U o‘n yildan beri «Manchester Siti» sharafini himoya qilib kelmoqda.