Seshanba oqshomida Madridning «Real» klubi Ispaniya chempionatining 33-turida «Alaves» jamoasi ustidan 2:1 hisobida qiyin g‘alabani qo‘lga kiritdi. Ma’lum bo‘lishicha, bu bilan madridliklar o‘zlarining g‘ayrioddiy seriyasini davom ettirishgan.

Gap shundaki, bu klub tarixida chempionat doirasida seshanba kuniga to‘g‘ri kelgan 15-uchrashuv edi. «Real» esa mana shunday kunda o‘tkazilgan barcha 15 ta o‘yinning hammasida g‘alaba qozongan.

Bu butun chempionat uchun rekord natija hisoblanadi — Ispaniya birinchiligining boshqa biror klubi La Liganing qaysidir aniq bir kunida o‘tkazilgan o‘yinlarda 100 foizlik ko‘rsatkichga ega emas. Faqat «Real» va faqat seshanba kunlari shunday natija qayd etmoqda.

Kelgusi turda madridliklar Sevilyada «Betis»ga qarshi maydonga tushishadi. Bu bahs juma kuni bo‘lib o‘tadi.