«Barselona» yarim himoyachisi Frenki de Yong klubga bo‘lgan munosabati haqida gapirib berdi.

«Men uchun «Barselona»dan yaxshiroq klub yo‘q. Bolaligimdan shu yerda bo‘lishni orzu qilganman, bu yerdagi oilaviy hayot esa ideal darajada. Boshqa biror joyga o‘tish uchun hech qanday sabab ko‘rmayapman», — dedi de Yong.

Niderlandiyalik futbolchi, shuningdek, 2024 yilning fevral oyida bo‘lib o‘tgan matbuot anjumani haqida ham to‘xtalib o‘tdi. O‘shanda u o‘zining klubdan ketishi mumkinligi haqidagi xabarlar uchun OAVni yolg‘onchilikda ayblagan edi.

«Ha, men buni qilganman, chunki bu narsa «Barselona» muxlislariga ta’sir qila boshlagandi. Ko‘chada odamlar menga shu haqida gapirishdi. Bu juda katta salbiy ta’sir ko‘rsata boshladi.

Jurnalistlar siz haqingizda yozadigan narsalar boshqalar sizni qanday qabul qilishiga kuchli ta’sir qilishiga aminman. Shu sababli, bunga qarshi qat’iy fikr bildirishni lozim deb topdim», — deya ta’kidladi de Yong.