«Manchester Yunayted» hujumchisi Joshua Zirkzee faoliyatini «Yuventus»da davom ettirishi mumkin. 24 yoshli futbolchi Angliyada o‘z o‘rnini topa olmadi, shu sababli kelasi yozda jamoani tark etish imkoniyatlarini ko‘rib chiqmoqda.
Calciomercato nashrining xabariga ko‘ra, Turin klubi niderlandiyalik futbolchiga bo‘lgan qiziqishini qayta tiklagan va joriy mavsum yakunlangach, rasmiy taklif bilan chiqishga tayyor. «Keksa sinyora» rahbariyati hujumchini taxminan 30 million yevroga baholamoqda.
Joshua Zirkzee joriy mavsumda «qizil iblislar» libosida 22 ta o‘yinda maydonga tushib, o‘z hisobiga 2 ta gol va bitta golli uzatmani yozib qo‘ydi. Manchesterga ko‘chib o‘tishdan avval u A Seriyada «Bolonya» sharafini himoya qilgan.
