Bir yo‘la ikki nafar portugaliyalik futbolchi «Barselona»ning qiziqishlari doirasiga tushdi. Kataloniya klubi «Manchester Siti»ning 31 yoshli yarim himoyachisi Bernardu Silva va «Chelsi»ning 26 yoshli vingeri Pedru Netuni sotib olish imkoniyatlarini ko‘rib chiqmoqda, deb xabar bermoqda Mundo Deportivo.
«Ko‘k-anorranglilar» kelasi yozda hujum chizig‘ini kuchaytirishga umid qilishmoqda va har ikki futbolchi buning uchun mos nomzod sifatida ko‘rilmoqda. Silva jamoaga erkin agent maqomida kelishi mumkin — u «shaharliklar» bilan tugayotgan shartnomasini uzaytirmoqchi emas. Transfermarkt portali tomonidan 60 million yevroga baholangan Netu esa, agar «Chelsi» joriy mavsum yakunlariga ko‘ra Chempionlar ligasiga yo‘llanma ololmasa, jamoadan ketish haqida o‘ylab ko‘rishi ehtimoldan xoli emas.
