Angliyaning «Manchester Yunayted» klubiga tegishli bo‘lgan va ijara asosida Turkiyaning «Trabzonspor» jamoasida to‘p surayotgan darvozabon Andre Onana «Samsunspor»ga qarshi o‘yinning bosh qahramoniga aylandi.
23 aprel kuni bo‘lib o‘tgan mamlakat kubogining chorak final uchrashuvida asosiy va qo‘shimcha vaqtlarda 0:0 hisobi qayd etildi. Natijada g‘olibni aniqlash uchun jamoalar penaltilar seriyasiga yo‘l olishdi. Onana o‘z mahoratini ko‘rsatib, raqiblarning 3 ta zarbasini qaytarishga muvaffaq bo‘ldi. Uning klubi 3:1 hisobida g‘alaba qozonib, yarim final yo‘llanmasini qo‘lga kiritdi.
13 may kuni bo‘lib o‘tadigan yarim final bahsida «Trabzonspor» «Genchlerbirligi» bilan to‘qnash keladi. 30 yoshli kamerunlik posbonning turk klubi bilan ijara shartnomasi mavsum yakunigacha mo‘ljallangan.
