Англиянинг «Манчестер Юнайтед» клубига тегишли бўлган ва ижара асосида Туркиянинг «Трабзонспор» жамоасида тўп сураётган дарвозабон Андре Онана «Самсунспор»га қарши ўйиннинг бош қаҳрамонига айланди.
23 апрель куни бўлиб ўтган мамлакат кубогининг чорак финал учрашувида асосий ва қўшимча вақтларда 0:0 ҳисоби қайд этилди. Натижада ғолибни аниқлаш учун жамоалар пенальтилар сериясига йўл олишди. Онана ўз маҳоратини кўрсатиб, рақибларнинг 3 та зарбасини қайтаришга муваффақ бўлди. Унинг клуби 3:1 ҳисобида ғалаба қозониб, ярим финал йўлланмасини қўлга киритди.
13 май куни бўлиб ўтадиган ярим финал баҳсида «Трабзонспор» «Генчлербирлиги» билан тўқнаш келади. 30 ёшли камерунлик посбоннинг турк клуби билан ижара шартномаси мавсум якунигача мўлжалланган.
