«Komo» bosh murabbiyi Sesk Fabregas «Chelsi» tomonidan unga bo‘layotgan qiziqish haqidagi ma’lumotlarga izoh berdi. Chorshanba kuni, 22 aprel kuni London klubi Liam Rosenyor ishdan bo‘shatilganini e’lon qilgan edi.
«Bu borada aytadigan gapim yo‘q. Hozir bu haqda o‘ylash ahmoqlik bo‘lardi. Men hatto prezidentimizning bu masala bo‘yicha biror gapini ko‘rganim ham yo‘q. Faoliyatimni «Komo» bosh murabbiyi sifatida davom ettirishimga ishonaman», — deya Fabregasning so‘zlarini keltiradi jurnalist Fabrisio Romano o‘zining X ijtimoiy tarmog‘idagi sahifasida.
Fabregas 2024 yil yozidan beri «Komo»ni boshqarib kelmoqda. Italiya chempionatining 33 turidan so‘ng jamoa 58 ochko jamg‘arib, beshinchi o‘rinni egallab turibdi. Ispaniyalik mutaxassisning amaldagi mehnat shartnomasi 2028 yil yozigacha mo‘ljallangan.
