Hujumchi Ansu Fati shu yozda Ispaniya terma jamoasi tarkibida Jahon chempionatiga borish fikridan qaytgani yo‘q. Uning hisobida joriy mavsumda allaqachon o‘nta gol mavjud — aytish mumkinki, «Barselona»ning sobiq a’zosi, garchi jamoa uchun yangi Messi yoki Yamalga aylana olmagan bo‘lsa-da, qayta «tirilmoqda».

Qiziqarli statistikaga ko‘ra, Fati hozirda ispaniyalik futbolchilar ichida eng ko‘p gol urayotgan o‘yinchi hisoblanadi: u o‘rtacha har 111 daqiqada raqib darvozasini ishg‘ol qilmoqda. Taqqoslash uchun, Ferran Torres har 126 daqiqada, Lamin Yamal esa har 153 daqiqada gol urmoqda. Shu sababli Fati mundialga borishdan umidvor, ayniqsa, agar Yamal olgan jarohati sababli turnirni o‘tkazib yuborishi ma’lum bo‘lsa, uning imkoniyatlari yanada ortadi.