«Arsenal» bosh murabbiyi Mikel Arteta jamoasining ikki hujumchisi — Viktor Dyokeresh va Kay Xaversni o‘zaro taqqosladi.
Ispaniyalik mutaxassis har ikki futbolchini navbatma-navbat asosiy tarkibda maydonga tushirmoqda, ba’zi hollarda esa ularning ikkalasiga ham bir vaqtda maydonda joy topmoqda.
«Ular mutlaqo har xil futbolchilar, lekin raqibga qarab talablar ham keskin farq qilishi mumkin. Masalan, «Manchester Siti»ga qarshi o‘yindagi vazifalar «Bornmut»ga qarshi bahsdagidan butunlay boshqacha edi. Gap ularni taqqoslashda emas, balki turli xislatlarga ega o‘yinchilardan qanday qilib eng yaxshi tarzda foydalanish haqida ketmoqda. Ular bizni kuchliroq qiladi, vazifamiz esa g‘alaba qozonish uchun ulardan to‘g‘ri foydalanishdir», — dedi Arteta matbuot anjumanida.
Bugun Toshkent vaqti bilan soat 21:30 da «to‘pchilar» uchun o‘z maydonida «Nyukasl»ga qarshi kechadigan bahs boshlanadi.
