Maxachqal’aning «Dinamo» klubi hujumkor yarim himoyachisi Muhammadjavad Husaynnajod Eron terma jamoasining 2026 yilgi Jahon chempionatidagi ishtiroki borasida o‘z fikrlarini bildirdi.
Mart oyida Eron sport vaziri AQSHning harbiy operasiyasi sababli milliy terma jamoa mundialda ishtirok etmoqchi emasligini ma’lum qilgan edi, biroq bu bo‘yicha terma jamoa tomonidan rasmiy bayonot berilmadi. FIFA prezidenti Janni Infantino esa eronliklar JCH-2026 ga kelishini bir necha bor ta’kidlagan.
«Har bir futbolchi uchun bu juda muhim. U yerda o‘ynashni istardim. Lekin biz Eron futbol federasiyasi nima qarorga kelishini va mezbon tomonda vaziyat qanday bo‘lishini kutishimiz kerak. Men shunchaki hammasi yaxshi bo‘lishiga umid qilaman», — deya futbolchining so‘zlarini keltiradi «Chempionat» nashri.
Bo‘lajak Jahon chempionatining guruh bosqichida Eron terma jamoasi Belgiya, Misr va Yangi Zelandiyaga qarshi bahs olib boradi.
