Angliya Premyer-ligasining 34-turi doirasida «Liverpul» o‘z maydonida «Kristal Pelas»ni qabul qildi va ishonchli g‘alabani qo‘lga kiritdi.
Uchrashuvning 35-daqiqasida mezbonlar hujumchisi Aleksander Isak hisobni ochdi. Ta’kidlash joizki, oyog‘i sinishi tufayli uch oydan ortiq vaqtni o‘tkazib yuborgan shvesiyalik forvard dekabr oyidan buyon ilk bor gol urdi. 40-daqiqada Endryu Robertson mersisaydliklarning ustunligini mustahkamladi. Ma’lumot uchun, Robertson joriy mavsum yakunida jamoani tark etishi kutilmoqda.
Mehmonlarning yagona javob goli 71-daqiqada Daniel Munyos tomonidan kiritildi. Bahsga yakuniy nuqtani esa hakam tomonidan qo‘shib berilgan vaqtda (90+6) Florian Virs qo‘ydi — 3:1.
Ketma-ket uchinchi g‘alabasini qo‘lga kiritgan «Liverpul» 58 ochko bilan turnir jadvalida to‘rtinchi o‘ringa ko‘tarilib oldi. «Kristal Pelas» esa 43 ochko bilan 13-pog‘onada bormoqda.
«LIVERPUL» — «KRISTAL PELAS» — 3:1
Gollar: Aleksander Isak 35 (1:0), Endryu Robertson 40 (2:0), Daniel Munyos 71 (2:1), Florian Virs 90+6 (3:1).
«Liverpul»: Vudman, van Deyk, Konate, Robertson (Jo Gomes, 87), Kyortis Jons (Milosh Kerkez, 87), Dominik Soboslai, Aleksis Makallister, Florian Virs, Kodi Gakpo, Muhammad Salax (Jeremi Frimpong, 59), Aleksander Isak (Rayan Gravenberx, 79).
«Kristal Pelas»: Din Xenderson, Maksans Lakrua, Kanvo, Kris Richards, Daiti Kamada, Adam Uorton, Tayrik Mitchell (Borna Sosa, 46), Daniel Munyos, Ismaila Sarr, Brennan Jonson (Yeremi Pino, 59), Jan-Filipp Mateta (Yorgen Strann Larsen, 70).
Ogohlantirishlar: Soboslai (90) — Munyos (19), Xenderson (32), Sosa (90).
