Myunxenning «Bavariya» klubi Vensan Kompani qo‘l ostida mag‘lubiyat nimaligini bilmay kelmoqda. Bundesliganing 31-turida «Mayns» ustidan qozonilgan irodali g‘alaba (4:3) myunxenliklarning muvaffaqiyatli seriyasini davom ettirdi.
E’tiborli jihati, myunxenliklar «Mayns» bilan bahsning birinchi bo‘limidan so‘ng 0:3 hisobida imkoniyatni boy berayotib, yakunda g‘alabani ilib ketishdi. Jamoa so‘nggi bor shu yilning 24 yanvarida «Augsburg»ga (1:2) imkoniyatni boy bergan edi. O‘shandan beri o‘tgan uch oy davomida «Bavariya» barcha turnirlarda 17 ta g‘alaba va 2 ta durang qayd etdi.
Jamoani oldinda mavsumning eng muhim bahslaridan biri kutmoqda. Myunxenliklar 28 aprel kuni Chempionlar ligasi yarim finali doirasida «PSJ» mehmoni bo‘lishadi.
