«Barselona» sobiq bosh murabbiyi Xavi Ernandes kelajakda qaysi jamoani boshqarishi mumkinligi haqida to‘xtalib o‘tdi. Ispaniyalik mutaxassis 2024 yilning may oyida «Barselona»dan iste’foga chiqarilganidan buyon ishsiz bo‘lib turibdi. Shu vaqt ichida uni bir qator klublar bilan bog‘lashdi, biroq hozircha amaliy qadamlar kuzatilmadi.

Afsonaviy sobiq futbolchi Romarioga intervyu berar ekan, Xavi kun kelib Braziliya terma jamoasida ishlashga qarshi emasligini tan oldi.

«Braziliya terma jamoasidagi faoliyat? Albatta, nega endi yo‘q? Braziliya — futbol beshigi», — deya ta’kidladi Xavi.

Hozirgi vaqtda «pentakampeonlar»ni Karlo Anchelotti boshqarmoqda. Taxminlarga ko‘ra, italiyalik mutaxassis Jahon chempionatidagi natija qanday bo‘lishidan qat’i nazar, o‘z lavozimini saqlab qoladi.