«Барселона» собиқ бош мураббийи Хави Эрнандес келажакда қайси жамоани бошқариши мумкинлиги ҳақида тўхталиб ўтди. Испаниялик мутахассис 2024 йилнинг май ойида «Барселона»дан истеъфога чиқарилганидан буён ишсиз бўлиб турибди. Шу вақт ичида уни бир қатор клублар билан боғлашди, бироқ ҳозирча амалий қадамлар кузатилмади.
Афсонавий собиқ футболчи Ромариога интервью берар экан, Хави кун келиб Бразилия терма жамоасида ишлашга қарши эмаслигини тан олди.
«Бразилия терма жамоасидаги фаолият? Албатта, нега энди йўқ? Бразилия — футбол бешиги», — дея таъкидлади Хави.
Ҳозирги вақтда «пентакампеонлар»ни Карло Анчелотти бошқармоқда. Тахминларга кўра, италиялик мутахассис Жаҳон чемпионатидаги натижа қандай бўлишидан қатъи назар, ўз лавозимини сақлаб қолади.
