«Real»ning yulduz hujumchisi Kilian Mbappe ertaga, 27 aprel kuni tibbiy ko‘rikdan o‘tadi, shundan so‘ng uning jarohati qay darajada jiddiy ekanligi ma’lum bo‘ladi. Bu haqda Mundo Deportivo jurnalistlari xabar bermoqda.

Fransiyalik hujumchi La Liga 32-turi doirasida safarda Sevilyaning «Betis» klubiga qarshi kechgan bahsni (1:1) oxirigacha yetkaza olmadi. Kilian uchrashuv yakunida almashtirildi. Matbuotda tarqalgan xabarlarga ko‘ra, futbolchining son sohasi orqa mushaklarida zo‘riqish yuzaga kelgan.

Ispaniya chempionatining joriy mavsumida Mbappe 28 ta uchrashuvda ishtirok etdi. Hujumchi o‘z hisobiga 24 ta gol va 4 ta golli uzatmani yozdirib qo‘ygan.