«Реал»нинг юлдуз ҳужумчиси Килиан Мбаппе эртага, 27 апрель куни тиббий кўрикдан ўтади, шундан сўнг унинг жароҳати қай даражада жиддий эканлиги маълум бўлади. Бу ҳақда Mundo Deportivo журналистлари хабар бермоқда.
Франциялик ҳужумчи Ла Лига 32-тури доирасида сафарда Севильянинг «Бетис» клубига қарши кечган баҳсни (1:1) охиригача етказа олмади. Килиан учрашув якунида алмаштирилди. Матбуотда тарқалган хабарларга кўра, футболчининг сон соҳаси орқа мушакларида зўриқиш юзага келган.
Испания чемпионатининг жорий мавсумида Мбаппе 28 та учрашувда иштирок этди. Ҳужумчи ўз ҳисобига 24 та гол ва 4 та голли узатмани ёздириб қўйган.
