Madridning «Atletiko» klubi hujumchisi Antuan Grizmann La Liga doirasida «Atletik Bilbao» ustidan qozonilgan g‘alabadan (3:2) so‘ng jurnalistlar bilan suhbatlashdi. Fransiyalik futbolchi maydonda 63 daqiqa harakat qilgan bo‘lsa-da, o‘z hisobiga gol yozib qo‘yishga ulgurdi.
Yakuniy hushtakdan so‘ng 35 yoshli forvard uchrashuvning eng yaxshi futbolchisi sovrinini qabul qilib oldi.
«Men «Atletiko»dagi so‘nggi o‘yinlarimdan haqiqiy zavq olmoqdaman. Umid qilamanki, ketishimdan oldin muxlislarga qandaydir maxsus sovg‘a taqdim eta olaman», — deya Grizmannning so‘zlarini keltiradi Atletico Universe.
Eslatib o‘tamiz, «matraschilar» faxriysi allaqachon «Orlando Siti» klubi bilan shartnoma imzolagan — transfer shu yozda amalga oshadi.
Chorshanba kuni «Atletiko» o‘z maydonida Chempionlar ligasi yarim finali doirasida «Arsenal»ni qabul qiladi.
