Londonning «Chelsi» klubi yozgi transfer oynasida tarkibni sezilarli darajada qisqartirishni rejalashtirmoqda. Football Transfers nashri xabariga ko‘ra, bir yo‘la bir nechta futbolchilarning londonliklar bilan xayrlashishi kutilmoqda.

Mudofaa chizig‘idagi o‘zgarishlar

Hozirda «Vest Xem»da ijara asosida to‘p tepayotgan markaziy himoyachi Aksel Disasi «bolg‘achilar»ning doimiy asosiy tarkib o‘yinchisiga aylangan. Agar «Vest Xem» Premyer-ligadagi o‘rnini saqlab qolsa, futbolchining transfer huquqini to‘liq sotib olishi kutilmoqda. Aks holda, «aristokratlar» himoyachi uchun boshqa jamoa izlashiga to‘g‘ri keladi.

Yana bir himoyachi Benua Badiashile ham ketishga yaqin turibdi. 2026 yilning yanvaridan buyon APL bahslarida maydonga tushmagan futbolchi asosiy tarkibdagi o‘rnini butunlay yo‘qotgan va klub uni sotuvga qo‘yishga tayyor.

Hujumchilar taqdiri

Myunxenning «Bavariya» klubida ijarada yurgan Nikolas Jeksonning holati biroz mavhum bo‘lib turibdi. Senegallik hujumchi Germaniyada qolishni istayotgan bo‘lsa-da, uning sermahsulligi myunxenliklarni qoniqtirmayapti. Shu sababli Jekson «Chelsi»ga qaytishga tayyorgarlik ko‘rmoqda.

Shuningdek, joriy mavsum Premyer-ligada bor-yo‘g‘i bitta gol urishga muvaffaq bo‘lgan Liam Delap ham jamoa talablariga javob bermayapti deb topilgan. Uning ham yozda yangi klubga o‘tish ehtimoli yuqori baholanmoqda.

Garnacho sotuvga qo‘yilishi mumkin

Klubning eng qimmatbaho aktivlaridan biri Alexandro Garnacho borasida ham muzokaralar bo‘lishi mumkin. Xabarlarga ko‘ra, argentinalik iqtidor sohibini 40 million funt sterling evaziga sotish varianti ko‘rib chiqilmoqda. E’tiborli jihati, yaqinda iste’foga chiqarilgan Liam Rosenyor futbolchining kelajagi borasida aniq bir qarorga kelmagan edi.