Madridning «Real» klubi ichki muhitida jiddiy keskinlik yuzaga kelgani haqida ma’lumotlar tarqalmoqda. Ispaniyaning nufuzli COPE nashri xabariga ko‘ra, jamoa bosh murabbiyi Alvaro Arbeloa va hujumchi Kilian Mbappe o‘rtasidagi munosabatlar murakkablashgan.
Manbaning ta’kidlashicha, murabbiy va futbolchi o‘rtasidagi o‘zaro tushunish avvalgi darajada emas. Hattoki, ushbu holat Xabi Alonso davridagi muhit bilan solishtirilganda ancha sovuq va muayyan masofa mavjudligi qayd etilmoqda.
Kelishmovchilikka nima sabab bo‘ldi?
Mazkur sovuqchilikka ijtimoiy tarmoqlardagi bir holat sabab bo‘lgan bo‘lishi mumkin. Avvalroq, Mbappe 2012 yilda Joze Mourinyo qo‘l ostida to‘p surgan Krishtianu Ronaldu va Mesut O‘zil, shuningdek, hozirgi tarkib vakillari — Mbappe va Arda Gyuler aks etgan kollajga «layk» bosgani shov-shuvga sabab bo‘lgan edi.
Ushbu harakat ortidan OAVda «Real» rahbariyati Arbeloa o‘rniga yana Joze Mourinyoni qaytarishi mumkinligi haqida xabarlar ko‘paydi. Portugaliyalik mutaxassisning o‘zi ham Madridga qaytish ehtimolini inkor etmagani vaziyatni yanada keskinlashtirgan.
Mbappening natijalari
Ichki kelishmovchiliklarga qaramay, Kilian Mbappe joriy mavsumda yuqori samaradorlik namoyish etmoqda. U barcha musobaqalarda jami 41 ta uchrashuvda maydonga tushib, o‘z hisobiga 41 ta gol va 6 ta golli uzatma yozdirib qo‘yishga muvaffaq bo‘lgan.
