«Barselona» 32-tur natijalariga ko‘ra «Real» bilan oradagi farqni 11 ochkogacha yetkazdi. Kataloniyaliklar kelgusi turdayoq chempionlikni rasmiylashtirishlari mumkin — buning uchun ular «Osasuna»ni mag‘lub etishlari, «Real» esa ochko yo‘qotishi talab etiladi.
«Xetafe» ustidan qozonilgan g‘alabadan so‘ng «Barselona» bosh murabbiyi Xans-Diter Flik o‘z fikrlarini bildirdi:
«Biz o‘z o‘yinimizni namoyish etishni, o‘z uslubimizda harakat qilishni istagan edik. To‘p bilan va to‘psiz harakatlarda ko‘rganlarimni juda qadrlayman. Biz diqqatimizni jamlagan edik va vazifani yaxshi uddaladik. «Real» bilan farq 11 ochkoga yetdimi? Men barcha hisob-kitoblarni unutishni istayman. Bugun sodir bo‘layotgan voqealar muhimroq. Boshqa o‘yinlar haqida o‘ylash kerak emas. Bayramni hamma ish yakuniga yetgach nishonlash lozim», — dedi Flik flesh-intervyuda.
Eslatib o‘tamiz, «Barselona» va «Real» 10 may kuni «Kamp Nou»da to‘qnash kelishadi.
