Milliy ligalarga yaqin orada o‘z mamlakatlaridan tashqarida o‘yinlar o‘tkazishga ruxsat berilishi mumkin, biroq bu bir mavsumda bir martadan oshmasligi kerak. Bu haqda The Guardian nashri xabar bermoqda.

Shuningdek, qabul qiluvchi davlatlar bir mavsumda boshqa ligalar bilan bog‘liq bo‘lgan ko‘pi bilan 5 ta o‘yinga mezbonlik qilishi kutilmoqda. FIFA ishchi guruhi tomonidan ishlab chiqilgan yangi protokol ushbu masalani hal qilish uchun aniq qoidalarni joriy etishga qaratilgan. Avvalroq La Liga va A Seriya o‘z o‘yinlarini AQSH va Avstraliyada o‘tkazishni rejalashtirgan edi, biroq bir qator noroziliklardan so‘ng bu rejalar bekor qilingandi.

Yangi protokolga ko‘ra, rasmiy o‘yinni boshqa davlatga ko‘chirish bo‘yicha har qanday so‘rov faqat barcha asosiy manfaatdor tomonlarning roziligi bilan ko‘rib chiqiladi, bunda FIFA veto qo‘yish huquqiga ega bo‘ladi. Katta ehtimol bilan yangi qoidalar keyingi mavsumdan kuchga kiradi.