Миллий лигаларга яқин орада ўз мамлакатларидан ташқарида ўйинлар ўтказишга рухсат берилиши мумкин, бироқ бу бир мавсумда бир мартадан ошмаслиги керак. Бу ҳақда The Guardian нашри хабар бермоқда.
Шунингдек, қабул қилувчи давлатлар бир мавсумда бошқа лигалар билан боғлиқ бўлган кўпи билан 5 та ўйинга мезбонлик қилиши кутилмоқда. ФИФА ишчи гуруҳи томонидан ишлаб чиқилган янги протокол ушбу масалани ҳал қилиш учун аниқ қоидаларни жорий этишга қаратилган. Аввалроқ Ла Лига ва А Серия ўз ўйинларини АҚШ ва Австралияда ўтказишни режалаштирган эди, бироқ бир қатор норозиликлардан сўнг бу режалар бекор қилинганди.
Янги протоколга кўра, расмий ўйинни бошқа давлатга кўчириш бўйича ҳар қандай сўров фақат барча асосий манфаатдор томонларнинг розилиги билан кўриб чиқилади, бунда ФИФА вето қўйиш ҳуқуқига эга бўлади. Катта эҳтимол билан янги қоидалар кейинги мавсумдан кучга киради.
